Authorization Required

This server could not verify that you are authorized to access the document requested. Either you supplied the wrong credentials (e.g., bad password), or your browser doesn't understand how to supply the credentials required.

Global Asturias

A única comida seca para mascotas feita en Galicia obtén o mesmo selo de calidade cá de consumo humano

Pablo Penedo Vázquez
Pablo Penedo VILAGARCÍA / LA VOZ

ACTUALIDAD

Coa certificación IFS Food, a compañía de Vilanova Nugape Pet Food sitúase nun selecto grupo de produtores mundiais no sector da alimentación para animais domésticos. Inmersa en plena expansión, aumentou nun 42,5 % o seu cadro de persoal no último ano

08 dic 2023 . Actualizado a las 12:12 h.

Nugape Pet Food, a empresa que desde o polígono industrial de Tremoedo se erixe na única fábrica galega de penso extrusionado para mascotas (croquetas, galletas...), vén de establecer un novo fito nos seus 18 anos de traxectoria. O propietario e CEO da firma de Vilanova de Arousa, Carlos Pérez, recolleu de mans de José Enrique Rodríguez Coello, director de AENOR en Galicia, a certificación IFS Food. Un exclusivo selo de calidade que, salientan desde a firma arousá, garante que a compañía que o recibe traballa cuns protocolos de calidade e de seguridade tan esixentes como os que se lles aplican aos produtos para consumo humano.

A empresa de Tremoedo conseguira con anterioridade outras das principais certificacións de seguridade, como a IFS Global Market. Con todo, a obtención da IFS Food resulta un enorme salto cualitativo, por canto a sitúa nun selecto grupo mundial de fabricantes do sector da alimentación para mascotas, principalmente cans e gatos, cun proceso de produción equiparable a todos os niveis co requirido á elaboración de comida para as persoas.

De que maneira conseguiu Nugape a IFS Food? Pois, como semella lóxico, superando longos e esixentes exames. Así, explican desde a empresa, auditores independentes da certificadora AENOR supervisaron durante meses os procesos de gobernanza e de compromiso da compañía arousá, poñendo a lupa no control da calidade e da seguridade da súa produción, da xestión de recursos, dos seus procesos operativos e procedendo a exhaustivas medicións e análises de todos os seus produtos.

A International Featured Standards (IFS) é unha entidade independente que emite diferentes certificados de calidade. No caso da norma IFS Food, avalía a capacidade do fabricante de alimentos de producir comida segura, auténtica e de calidade de acordo cos requisitos legais e coas especificacións dos clientes, controlando a trazabilidade de todo o proceso no mercado. As normas IFS están suxeitas á avaliación por parte de organizacións gubernamentais ou privadas.

Inmersa nun plan de crecemento

Con marcas como Cebican, Sandegal, Danna o Dousti e con forte presenza en tres continentes, Europa, Asia e África, Nugape Pet Food leva varios anos preparando un ambicioso plan de crecemento que empezou a ver os seus froitos no 2022 pero que, sinalan desde a compañía, ofrecerá os seus primeiros grandes resultados a partir do 2024. O próximo ano será cando o investimento nunha nova liña de envasado de 1.200 sacos/hora de penso extrusionado para mascotas se deixe notar xa de cheo nunha produción ascendente, como demostra o aumento de 40 a 57 traballadores en nómina no último ano, un 42,5 % máis. Ademais, Nugape ten en carteira a instalación de bombas de calor e 5.000 m2 de placas fotovoltaicas.