Pescadores e acuicultores franceses contan con un organismo que os representa e defende ante as autoridades públicas nacionais e comunitarias. É o Comité Nacional de Pesca Marítima e Cultivos Mariños (CNPMEM, polas súas siglas en francés) e acaba de anunciar que vai solicitar ás máximas autoridades do seu Estado que esixan explicacións e desculpas por un incidente que cualifican de «ataque inaceptable ao dereito marítimo e as relacións entre as flotas francesas e española», expoñen nunha nota.

O «incomprensible e inaceptable incidente» produciuse o día 20 de este mes de xullo. Nesa data, unha parella de arrastreiros peláxicos, composta polas embarcacións La Turballe e Le Guilvinec, pediron permiso para acceder a dentro das doce millas da costa española para buscar refuxio, debido ás malas condicións meteorolóxicas que había ese día, con moito vento e ondada.

Segundo explica o CNPMEM, pediuse permiso para entrar no porto de Xixón a través da CROSS Atlantique —o equivalente francés a Salvamento Marítimo—, pero se lle denegou o acceso aos dous arrastreiros peláxicos de pavillón francés.

A criterio del Comité Nacional de Pesca Marítima e Cultivos Mariños, a decisión do porto de Xixón «é inaceptable». E non só iso, engaden, é «profundamente contraria ao dereito marítimo, que sitúa a seguridade dos mariñeiros e dos barcos por riba de todo».

Na interpretación do organismo francés, trátase dunha negativa contraria ás regras de convivencia e despreza a «boa acollida de todos os profesionais franceses cara os buques españois dende hai tres anos», facilitándolles «zonas de pesca, portos de desembarque o servizos en terra», explica a carta. De aí que pidan contas ás autoridades estatais para que aclaren o incidente.

Contratar a un consignatario

Desde a Administración marítima española negan que se lles denegase atraque, fondeo ou asistencia aos dous arrastreiros peláxicos de bandeira francesa. Dende a Dirección Xeral de Mariña Mercante explican que, a instancias da Capitanía Marítima de Xixón, o Centro de Coordinación de Salvamento Marítimo indicoulles que tiñan que contratar a unha empresa consignataria para poder acceder ao peiraos xixoneses, razón pola cal se lles proporcionou un listado coas que podían contactar. Sen embargo, aínda que se trata dun trámite simple e sinxelo non o fixéron, razón pola que non puideron acceder.

---

---

---