20 e 29 de xullo • Cámping Baldaio e Terra-Bar Razo • Xa o avanzaron na presentación do último Pint: veñen dous anos de moita ciencia en Carballo a través do proxecto Talento km0. E o Concello vén precisamente de dar a coñecer cal será a seguinte actividade: un ciclo de divulgación que trasladará o coñecemento ás praias e que terá como fío condutor a eclipse do vindeiro 12 de agosto. 

Serán catro charlas, que se dividirán en dúas xornadas e que serán de acceso totalmente libre e gratuíto. Encadraranse na European Researcher's Night (Noite das persoas investigadoras) e, seguindo o modelo do Pint of Science, nos descansos haberá concursos e sorteos.

A primeira xornada será o día 20 de xullo, ás 20.30 horas, no cámping Baldaio. Abrirá as intervencións Isabel Lema Gesto, profesora titular da área de Oftalmoloxía na USC, que ofrecerá a charla A eclipse a través dos teus ollos: mirar o sol de xeito seguro. Isabel conta «cunha destacada traxectoria como investigadora no campo das neurociencias clínicas e a patoloxía do sistema visual», avanza o consistorio, engadindo que durante a súa intervención aportará claves médicas «para gozar da eclipse protexendo a saúde ocular», indican.

César González García, doutor en Astrofísica e investigador do CSIC, tomará o relevo coa charla Ceos de pedra: eclipses na historia e na cultura. César estuda como as distintas civilizacións interpretaron a plasmaron os fenómenos celestes e as eclipses ao longo da historia.

A segunda xornada, tamén ás 20.30, será o 29 de xullo en Terra Bar, Razo. Cando un aliñamento dos astros non é suficiente leva por título a intervención da profesora e investigadora na área de Matemática Aplicada da USC Begoña Nicolás Ávila, que «descubrirá ao público a precisión matemática e as variables que rexen os movementos dos astros no noso sistema solar», di o Concello.

Pechará Óscar Blanco Varela, astrofotógrafo, divulgador e director do Centro Astronómico Trevinca.

---

---

---