O estudo Galicia ten un referente: Isidro Parga Pondal, realizado polo investigador Ricardo Gurriarán, reivindica a figura do eminente xeólogo, a quen lle foi dedicado o Día da Galeguidade Empresarial, instituído polo Foro Enrique Peinador. «Probablemente esteamos a falar do científico galego máis importante do século XX», defende Gurriarán neste libro, presentado onte na Reitoría da Universidade de Santiago (USC), coa presenza do reitor, Juan Viaño, e do presidente do foro, Xosé González Martínez. A USC organiza mañá un acto académico e inaugura un busto, na Facultade de Química, para honrar a Parga Pondal, quen foi docente do centro desde case o inicio do seu funcionamento até 1936, cando foi expulsado «por esquerdista e galeguista», recorda Gurriarán. Realizou un importante traballo como docente e investigador, con proxección internacional como pioneiro na xeoquímica, acrecentou o autor.

Ao deixar as aulas, Parga Pondal promoveu o Laboratorio Xeolóxico de Laxe, e colaborou con iniciativas empresariais galegas, como Cementos Oural ou Zeltia, relacionadas cos irmáns Fernández López, con quen colaborou estreitamente. Mantivo o prestixio internacional e tivo importantes recoñecementos académicos, entre eles o Doutoramento Honoris Causa, en 1983, pola USC, segundo salientou Gurriarán.

---

---

---