O reitor da Universidade de Santiago, Juan Casares Long, e o vicerreitor de Coordinación e Planificación do campus lucense, Pedro García Herradón, asistirán o sábado á apertura da primeira xornada de divulgación da micoloxía organizada pola Estación Científica do Courel. A súa presenza responde ao feito de que esta é a primeira actividade pública que se organiza no centro universitario desde que tomou posesión do cargo o seu actual director, o catedrático Antonio Rigueiro, nomeado o pasado maio.

A xornada abrirase ás dez da mañá. Media hora máis tarde haberá unha conferencia na que se explicarán os principios xerais da micoloxía e a morfoloxía dos diferentes tipos de cogomelos. Ás doce e media, despois dunha pausa para café, comezará outra conferencia sobre os principais tipos de setas comestibles e tóxicas, como diferencialas e como reaccionar ante posibles intoxicacións. Nesta intervención falarase tamén sobre os métodos de localización das especies de maior interese gastronómico e sobre os usos das setas na cociña. Os relatores serán, respectivamente, o biólogo Manuel Antonio Rodríguez Guitián, profesor da Escola Politécnica Superior de Lugo, e o propio director da estación, Antonio Rigueiro, doutor en enxeñería de montes.

O programa complementarase cunha saída guiada ao campo para identificar e recoller cogomelos típicos da zona. O percorrido comezará ás catro da tarde.

Segundo explica Rigueiro, as corenta prazas dispoñibles para asistir a esta xornada xa están cubertas. En vista da alta demanda desta actividade -engade o director-, xa se está preparando outra xornada dedicada á mesma temática para o día 23. A inscrición nestas actividades é gratuíta e os interesados poden apuntarse chamando aos teléfonos 982 821 900 -de 10 a 13 horas de luns a venres-, 648 051 928 e 600 942 418.

Novas actividades

A dirección da estación científica ten previsto organizar máis adiante outras xornadas de divulgación destinadas aos veciños da zona que se dedicarán á apicultura, ao coidado e aproveitamento das árbores froiteiras e a outros recursos tradicionais da Serra do Courel.

---

---

---