O Parque Tecnolóxico de Galicia-Tecnópole vén de abrir o prazo de recepción de proxectos para a Galiciencia 2013 ata o próximo 23 de outubro. Os estudantes de secundaria aspirantes a expoñer na feira científica que terá lugar entre o 20 e o 22 de novembro nas instalacións do Parque Tecnolóxico de Galicia, no concello ourensán de San Cibrao das Viñas poderán achegar as súas propostas para a selección dos 50 participantes definitivos.

As bases de participación na Galiciencia 2013, organizada co apoio da Consellería de Economía e Industria, a través da Axencia Galega de Innovación, están dispoñibles na web de Tecnópole (www.tecnopole.es). O requisito é formar un equipo no que participen varios alumnos e un profesor e contar en tres folios un proxecto experimental e tecnolóxico ou un traballo documental.

Tecnópole organiza actividades paralelas para público e participantes. Este ano haberá, entre outros, varios talleres relacionados coa celebración do Ano Internacional da Cooperación na Esfera da Agua e un espectáculo científico que poderá seguirse en streaming (en vídeo vía Internet) dende todos os centros de ensino de Galicia.

CURSO PARA PROFESORES

Como novidade, a programación da Galiciencia incluirá este ano, entre outubro e principios de novembro e nas catro provincias, talleres de capacitación dirixidos aos profesores para que axuden aos seus estudantes a preparar os proxectos, tanto para presentar na edición da Galiciencia como para outros certames similares de carácter estatal.

Galiciencia incluirá un concurso de fotografía e debuxo e un proxecto colectivo de vídeo que dará como resultado unha reportaxe audiovisual elaborada coas achegas de todos os participantes. Por outra parte, volverase montar a redacción da revista oficial da Galiciencia, composta por participantes no evento e que traballará para ofrecerlles aos asistentes o número impreso o último día da feira.

---

---

---