Médico do servizo de urxencias do hospital Cristal, Francisco Aramburu vén de ser elexido presidente da Sociedade Galega de Médicos de Emerxencias. Con 450 socios aos que representar, o médico ourensán expón os retos desta nova andaina. -Somos unha sociedade científica, non unha asociación profesional, así que pretendemos que o noso traballo sexa, fundamentalmente, científico e de promoción da investigación. -¿Con que armas se vai conseguir ese obxectivo? -Queremos facer consensos, guías e protocolos de ámbeto galego para que todos os servizos de urxencias teñan o mesmo referente respecto a patoloxías concretas. Queremos conseguir que o paciente reciba un pouco máis de calidade e unificar criterios para que os enfermos sigan o mesmo camiño dende que entran en urxencias. -¿Hai xa traballo feito nese senso? -Posiblemente nun mes sairá publicada unha guía de asma e epoc (enfermidade pulmonar obstructiva crónica). Ten de especial que non é unha guía máis, senón algo específico para tratar a ese tipo de pacientes cando chegan a un servizo de urxencias. Dese xeito queremos seguir traballando en moitas outras patoloxías. -¿A investigación é hoxe a gran ausente? -Co sistema actual de traballo os profesionais de urxencias apenas teñen tempo para investigar, pero a sociedade vai solicitar unha beca e tomar iniciativas para facer posible a unión de traballo cotián e plans de investigación. -¿Que completa o plantel de reivindicacións? -O recoñecemento da especialidade e da categoría de médico de urxencias.

---

---

---